Aisa Hi Koi Khwaab Hamara Bhi Kabhi Tha | Ahmad Faraz

Urdu Shayari by Ahmad Faraz

♥
Wo dushman e jaaN, jaan se pyara bhi kabhi tha
Ab kis-se kahen, koi hamara bhi kabhi tha
♥
Utra hai rag-o-pai mein to dil kat sa gaya hai
Ye zehr judaai, ke gawara bhi kabhi tha
♥
Har dost jahan abr-e-gurezaN ki tarah hai
Ye shaher, yehi shaher, hamara bhi kabhi tha

♥
Titli ke t’aqqub me koi phool sa bachchaa
Aisa hi koi khwaab hamara bhi kabhi tha
♥
Ab agle zamane ke mile log to puchheN
Jo haal hamara hai, tumhara bhi kabhi tha?
♥
Har bazm mein ham ne use afsurdah hi dekha
Kehte hein “Fraz” anjuman aaraa bhi kabhi tha
♥

Mazeed : kalam-e-Ahmad Faraz