Wo keh gaya tha yahi waqt imtehaan ka hai

*

Mein khud zameeN hun, magar zarf aasman ka hai
Ke toot kar bhi mera hosla chataan ka hai

*

Bura n maan, mere lafz zehr zehr sahi
Mein kya karun ke yahi zaiqa zuban ka hai

*

Har ek pe musallat hai dil ki veerani
Tamam shehr pe saya mere makan ka hai

*

Bicharte waqt se ab tak mein yun nahin roya
Wo keh gaya tha yahi waqt imtehaan ka hai

*

Musafiron ki khabar hai n dukh hai kashti ka
Hwa ko jitna bhi gham hai wo baadbaan ka hai

*

Jo barg-e-zard ki surat hawa mein udta hein
Wo ek warq meri apni daastaan ka hai

*

Ye aur baat, adalat hai be khabar warna
Tamam shehr mein charcha mere bayaan ka hai

*

Asar dikha n saka us ke dil mein ashk mera
Ye teer bhi kisi tooti huii kamaan ka hai

*

Bichhad bhi jaaye magar mujh se be-khabar bhi rahe
Ye hausla hi kahan mere bad-gumaan ka hai

*

Qafas to khair muqaddar mein tha magar “Mohsin”
Hwaa mein shor abhi tak meri udaan ka hai

*

(( Mazeed.. kalam-e-Mohsin Naqvi ))