free web stats
Facebook Twitter Gplus RSS

Welcome to Mehfil-e-Shayri: This site is a collection of beautiful sher o shayri, famous urdu hindi Poetry, Urdu ke ustaad shayroN ke kalam, ghazal, nazam, naat, duaa, or behtareen ash'ar ka khazana.

Poochha Kisi Ne Haal Kisi Ka To Ro Diye

VN:F [1.9.22_1171]
Rating: 3.5/5 (15 votes cast)

Urdu Sad Poetry,, By Saghar Siddiqui

*

Poochha kisi ne haal kisi ka to ro diye
pani mein aks chand ka dekha to ro diye

*

Naghma kisi ne saaz pe chherha to ro diye
Guncha kisi ne shaakh se torha ro ro diye

*

Udhta huwa ghubar sar-e-raah dekh kar
Anjaam ham ne ishq ka socha to ro diye

*

Badal fiza mein aap ki tasweer ban gaye
Saya koi khayaal se guzra to ro diye

*

Rang-e-shafaq se aag shagufon mein lag gai
“Saghar” hamare haath se chhalka to ro diye

*

( Click here for more kalam-e-Saghar Siddiqui )

Shararon Ko Nasheman Ka NigehbaN Kar Liya Mein Ne

VN:F [1.9.22_1171]
Rating: 3.1/5 (7 votes cast)

Urdu Shayari Ghazal, By Saghar Siddiqui

*

Kisi ke ek tabassum par asaas-e-zindagi rakh li
Shararon ko nasheman ka nigehbaN kar liya mein ne

*

Utha kar choom li hai chand murjhaai hui kaliyaN
N tum aaye to yun jashn-e-baharaN kar liya mein ne

*

Abhi tak bekafan si hai meri wehshat ki uryaani
Ye kis ummid par ghar ko byabaN kar liya mein ne

*

Kabhi “Saghar” agar mein wajd mein aaya jo lehra kar
To apne saath duniya ko bhi raqsaN kar liya mein ne

*

( Click here for more kalam-e-Saghar Siddiqui )

Khud Hi Naraaz Kare Khud Hi Manane Aaye | Ghazal

VN:F [1.9.22_1171]
Rating: 3.6/5 (10 votes cast)

Urdu Shayari Urdu Ghazal

*

Teri khushboo meri aankhon mein basaane aaye
Dil ki duniya mein baharon ke zamane aaye

*

Ye alag baat hai taabeer n de saath mera
Khwaab to jitne bhi aaye wo suhane aaye

*

Wo hai maghroor magar pyar se majboor bhi hai
Khud hi naraaz kare khud hi manane aaye

*

Kyun taras aaya hai us ko meri tanhaai par
Wo mujhe meri nazar se n giraane aaye

*

Wo bataye n mujhe apne bichhar ne ka sabab
Us se keh do wo mera di n jalaane aaye

*

Pyar ka hota hai ab tak mujhe maloom n tha
ChoT khayi to mere hosh thikaane aaye

*

Jo mera dil bhi saja de mere chehre pe “Qateel”
Wo musavvir meri tasveer bana ne aaye

*

( Click here for more kalam-e-Qateel Shifai )

Urdu Mazahiya (Funny) Shayari / Poetry

VN:F [1.9.22_1171]
Rating: 3.5/5 (6 votes cast)

Urdu Mazahiya (Funny) Shayari / Poetry

*

Paas hai wade ka bhi, ulfat ka bhi iqraar hai
Phir bhi milne ko mera aana bohot dushwar hai

*

Gas aur petrol ki is load shedding ke tufail
Bus bhi be-bus ho chuki hai car bhi be-car hai

*

Dr Inam ul Haq Javed

*

Return to Funny Poetry

Ghar Mein Zara Kabhi Tu Use Cheekhte Bhi Dekh

VN:F [1.9.22_1171]
Rating: 5.0/5 (1 vote cast)

Bivi : Gharwali

*

Bahar badi khamosh si, kam go si hai magar
Ghar mein zara kabhi tu use cheekhte bhi dekh

*

Tujhse sarhi padi hai magar apni ammi se
Jo phone par hai lag rahe wo kehkahe bhi dekh

*

Har roz bhugte saalgirah rishte daaron ki
Bivi ke saath us ke sabhi naanke bhi dekh

*

Wo jin ke saath haath milana nahin pasand
Order mila hai hans ke wo sab thobde bhi dekh

*

Sohail Ahmed “Azizi”

*

Return to Funny Poetry

Tum Muntazir Rahoge n Aaya Karenge Ham

VN:F [1.9.22_1171]
Rating: 2.8/5 (9 votes cast)

Ghazal By Qamar Jalalabadi

*

Yun rasme-e-husn-o-ishq ko ruswa karenge ham
Tum muntazir rahoge n aaya karenge ham 

*

Khud aaine me apna tamasha karenge ham
Yun bhi shab-e-firaaq guzaara karenge ham

*

Jabtak nazar n aaoge aisa karenge ham
Har roz ek Khuda ko taraasha karenge ham

*

Tujhko bithake doorse dekha karenge ham
Yun bhi tere guroor se khela karenge ham

*

Jaa tujhse beniyaaz huwe bhuule tera zikr
Tu chahega to teri tamanna karenge ham

*

Click Here For More Kalam e Qamar Jalalabadi

Dil Pareshaan Hai Raat Bhaari Hai | Ghazal

VN:F [1.9.22_1171]
Rating: 3.3/5 (4 votes cast)

Ghazal By Qamar Jalalabadi

*

Dil pareshaan hai raat bhaari hai
Raat kya umr yun guzari ha

*

Wo haseen, fitratan shikari hai
Dena awaaz… kiski baari hai?

*

Maut kya Zindagi ko maaregi
Zindagi Zindagi ki maari hai

*

Subah aayi nahin, bulayi gayi
Raat guzri nahi, guzaari hai

*

Dil e be-muddaa kisee ka nahi
Saara sansaar hi bhikhari hai

*

Uska jalwa n dekh paaya koii
Pardah-daari ki pardah-daari hai

*

Click Here For More Kalam e Qamar Jalalabadi

Khud Bataegi Muhabbat Ke Muhabbat Kya Hai

VN:F [1.9.22_1171]
Rating: 3.8/5 (12 votes cast)

<< Qamar Jalalabadi >>

*

Ham-nasheeN kaise kahun jazba-e-ulfat kya hai
Khud bataegi muhabbat ke muhabbat kya hai

*

Ishq ko log majazee* kyun samajh baithe hain
Gar nahi ishq haqeeqat to haqeeqat kya hai

majazee = khayaali / naqli / aabhasi / simulations

*

Ishq ko bhoolke jannat ki hai duniya ko talaash
Ishq ki aag jo dozakh hai to jannat kya hai

*

Aaya parwana gira shama pe jal jal ke mara
Tu abhi soch raha hai ke muhabbat kya hai

*

Wo abhi aaye the yaa unka khayal aaya tha
Ae mere shauq zara bol haqeeqat kya hai

*

Meri badli huyi rangat meri haalat dekho
Dosto ab to samajh lo ke muhabbat kya hai

*

Click Here For More Kalam e Qamar Jalalabadi