Shayri Urdu – By Shehzad Ahmed

♥

Sitara apni hi tabindagi* n dekh saka
Wo dhundh thi, ke ye manzar koi n dekh saka

*Tabindagi = shine/brilliance/chamak

♥

Talash karte huwe ungliyaN jala daali
Wo teergi* thi ke mein shma bhi n dekh saka

*Teergi = Darkness/Andhkaar

♥

Mila tha shaam mujhe ik bujha huwa suraj
Mein us ke bad kabhi roshni n dekh saka

♥

Jo rabt* baqi tha sab qataa* kar liya us ne
Wo meharbaN meri bechargi n dekh saka

*Rabt = Relation | *Qataa = Break

♥

Nigaah wiase to baam-e-falak* ko chhoo aai
Mein jis zameeN pe khada tha, wahi n dekh saka

*Baam-e-Falak = Roof of the sky

♥

Wahi hai aainakhana* wahi hai tasveereN
Mein umar bhar koi sorat naii n dekh saka

*AainaKhana = Glass House

♥

Tamam shehr mein wo deedawar* huwa mashhoor
Jo apni naak se aage kabhi n dekh saka

*Deedawar = Connoisseur

♥

Shayri Urdu – By Shehzad Ahmed

Return to Bikhre Moti