Urdu Ghazal
Urdu Ghazal by A. Hafiz [Saahil Qadri] UK
♥
Fasurdah dil hai, nazroN ki pareshaani naheeN jaati
ke ab tasweer meri mujh se pehchaani naheeN jaati
tumhaari hee galee meN umr kat jaaye to behtar hai
ke mujh se dar badar kee khaak ab chaani naheeN jaati
ghulaami ne tumhaari wo ataa kee hai mujhe azmat
ke shaahi meN bhi dil se khooe-darbaani naheeN jaati
kaheeN laakhoN ka gunbad hai bashakle saaibaaN sar par
kaheeN ek chaadare boseeda jo taani naheeN jaati
payaame marg dete haiN hazaaroN haadise phir bhee
hamaari qawm kee saahil tan-asaani naheeN jaati
♥
Mazeed: Kalaam e Shaail





