Urdu Ghazal : Do Din Ki Zindagi Ka Maza Ham Se Puchhiye

Urdu Ghazal

Urdu Ghazal by Khumar Barabankvi

♥

ik pal mein ik sadi ka maza ham se puchhiye
Do din ki zindagi ka maza ham se puchhiye

Bhule hein rafta rafta unhen muddaton mein ham
QistoN mein khudkashi ka maza ham se puchhiye

Aaghaz-e-ashiqi ka mazah aap janiye
Anjaam-e-ashiqi ka maza ham se puchhiye

Jalte diyon men jalte gharon jaisi zau kahan
Sarkaar roshni ka maza ham se puchhiye

Wo jaan hi gaye ke hameN un se pyar hai
Ankhon ki mukhbari ka maza ham se puchhiye

Hansne ka shauq ham ko bhi tha aap ki tarah
Hansiye magar hansi ka maza ham se puchhiye

Ham taubah kar ke mar gaye be-maut ai “Khumar”
Tauhin-e-maikashi ka maza ham se puchhiye

♥

 Mazeed :  Khumar Barabankvi