Urdu Ghazal Shayari – Aap Kyun Ban Ke Pursaan-e-Gham Aa Gaye

Urdu Ghazal Shayari

Urdu Ghazal Shayari by Aamir Surati

♥
Aap kyun ban ke pursaan-e-gham aa gaye
Aur bhi sakht uljhan mein ham aa gaye
♥
Tum mere saath kya do qadam aa gaye
Zindagi ke maze baish-o-kam aa gaye
♥
Badah-khaane ke rasm-o-riwaaj aur hain
Tum kahan naaseh-e-mohtaram aa gaye
♥
Aage ab teri marzi pe hai munhasir
Tere dar tak to ay dost ham aa gaye
♥
Rang laakar rahi meri barbadiyan
Un ko andaaz-e-lutf-o-karam aa gaye
♥
Mera zauq-e-salamt-ravi dekh kar
Raah mein senkdoN pech-o-kham aa gaye
♥
Ay junun-e-tajassus khidhar ab chalen
Rokne raah dair-o-haram aa gaye
♥
Ho gai ek, raah-e-junun-o-khirad
Marhale zindagi ke aham aa gaye
♥
Fart-e-ishrat se ma’adoom thi har khushi
Waqt par kaam ranj-o-alam aa gaye
♥
Dekhi jab ghaur se wajh-e-zauq-e-wafa
Aap ke yaad jaur-o-sitam aa gaye
♥
Be-naqaabi ki zidd ka ho “Aamir” bura
Ham bhi nazron ka kho kar bharam aa gaye
♥

Mazeed : kalam-e-Aamir Surati