Aankh Se Door Na Ho Dil Se Utar Jaayegaa

<< Ahmad Faraz >>

*******

Aankh se door na ho dil se utar jaayegaa
Waqt kaa kyaa hai guzarataa hai guzar jaayegaa

*

Itanaa maanuus na ho Khalvat-e-Gam se apani
Too kabhi Khud ko bhi dekhegaa to Dar jaayegaa

*

Tum sar-e-raah-e-vafaa dekhate rah jaaoge
Aur Wo baam-e-rafaaqat se utar jaayegaa

*

Zindagi teri ataa hai to ye jaanewaala
Teri baKhshish teri dahaleez pe dhar jaayegaa

*

Dubate dubate kashti to uchhaala de duN
Main nahin, koi to saahil pe utar jaayegaa

*

Zabt-e-laazim hai dukh qayaamat kaa ‘Faraz’
Zaalim ab ke bhi na royegaa to mar jaayegaa

***

(Click here for more kalam-e-Ahmad Faraz)