Ab To ShahroN Se Khabar Aati Hai DiwaanoN Ki

<< Ahmed Nadeem Qasmi>>

*******

Ab to shahroN se Khabar aati hai diwaanoN ki
Koi pehchaan hi baaqi nahiN viraanoN ki

*

Subh hote hi nikal aate haiN baazaar men log
GathriyaaN sar pe uthaaye huae imaanoN ki

*

Apni poshaak se hoshiyaar, ke Khuddaam-e-qadim
DhajjiyaaN maangte haiN apne girebaanoN ki

(Khuddaam : attendant; qadim : old)

*

San’ateN phelti jaati hein magar iske saath
Sarhaden tooTti jaati hein gulistaanoN ki

*

Unko kyaa fikr ke maiN paar lagaa ke Duubaa
Bahes karte rahe saahil pe jo toofaanon ki

*

Maqbare bante haiN zindoN ke makaanoN se baland
Kis qadar auj pe takrim hai insaanoN ki

(maqbare : tombs)

*

Teri rahmat to musallam hai magar ye to bataa
Kaun bjli ko Khabar detaa hai kaashaanoN ki

(kaashaane : shelters)

*

Abhi takmil ko pahunchaa nahiN zehnoN kaa gudaaz
Abhi duniyaa ko zaruurat hai ghazal-KhvaanoN ki

(takmil : fulfillment; gudaaz : development; ghazal-KhvaanoN : Ghazal reciters)

***

(Click here for more kalam-e-Ahmed Nadeem Qasmi)