Andaaz Hu-b-Huu Teri Aawaaz-e-Paa Ka Thaa

<< Ahmed Nadeem Qasmi>>

*******

Andaaz hu-b-huu teri aawaaz-e-paa ka thaa
Dekhaa nikal ke ghar se to jhouNka hawaa ka thaa

*

Is husn-e-ittefaaq pe luT kar bhi shaad huN
Teri razaa jo thi, wo taqaazaa wafaa ka thaa

*

Dil raakh ho chukaa to chamak aur badh gai
Ye teri yaad thi ke amal kimiyaa ka thaa

*

Is rishta-e-lateef ke asraar kyaa khuleN
Tu saamne thaa aur tasawwur Khudaa ka thaa

*

Chhup chhup ke rouN aur sar-e-anjuman haNsuN
Mujh ko ye mashwara mere dard-aashnaa ka thaa

*

Utthaa ajab tazaad se insaan kaa Khameer
Aadi fanaa kaa thaa to puNjaari baqaa ka thaa

*

TooTaa to kitne aaina-KhaanoN pe zad paRi
ATkaa huaa gale mein jo paththar sadaa ka thaa

*

Hairaan huN ke daar se kaise bachaa “Nadeem”
Wo shakhs to Gharib-o-Ghayyoor intihaa ka thaa

***

(Click here for more kalam-e-Ahmed Nadeem Qasmi)