Be Dard.! Main Ne Tujh Ko Bhulaya NahiN Hanuuz

We would be extremely happy if you would tell others by pressing the share button below.

<<Josh Malihabadi >>

*******

Naqs-e-Khayaal dil se mitaya nahiN hanuuz*
Be-dard.! main ne tujh ko bhulaya nahiN hanuuz

hanuuz = ab tak (abhi tak)

*

Teri hi zulf-e-naaz ka ab tak aseer* hun
Yani kisi ke daam* mein aaya nahiN hanuuz

[aseer = qaidi, bandhak | daam = jaal, chaalbazi, trap]

*

Yadash-b-khair jis pe kabhi thi teri nazar
Wo dil kisi se main ne lagaya nahiN hanuuz

*

Mehrab-e-jaaN mein tune jalaya tha khud jise
Seene ka wo charagh bujhaya nahiN hanuuz

*

Be hosh ho ke jald tujhe hosh aa gaya
Main bad naseeb hosh mein aaya nahiN hanuuz

*

Tu kaar-o-baar-e-ishq mein tanha nahin raha
Meraa kisi ne haath batayaa nahiN hanuuz

*

Gardan ko aaj bhi teri bahoN ki yaad hai
Ye mannatoN ka toq badhaya nahiN hanuuz

*

Mar kar bhi aayegi ye sadaa qab-e-“Josh” se
Be dard.! main ne tujh ko bhulaya nahiN hanuuz

*

( Click here for more kalam-e-Josh Malihabadi )