-: Qateel Shifai :-
<<->>
Kam kam kaho, sanbhal ke kaho, shaan se kaho
Roodad-e-shouq zabt ke unwaan se kaho
*
Is me kuchh apne pyaar ki izzat ka hai sawaal
Aa jaye raah par, dil-e-naadaan se kaho
*
Tark-e-wafaa jahaaN me koi jurm to nahi
Kya tum wafaa sheaar ho, imaan se kaho
*
Us dar pe ahl-e-dil ko nahi puuchhta koi
Tum ik rayees-e-shahr ho! darbaan se kaho
*
KyuN le rahe ho hazrat-e-naaseh ka imtehaan
Jo dil ki baat hai, kisi insaan se kaho
*
Humne banaa liyaa hai naya phir se aashiyaaN
Jaao ye baat phir kisi toofaan se kaho
*
Kis munh se ab “Qateel” pe dharte ho tohmateN
Yeh sab hikaayateN kisi anjaan se kaho…!!
*
( Click here for more kalam-e-Qateel Shifai )
Leave a Reply