Jaadu Hai Mere Haath Mein, Mujh Ko Pataa n Thaa

We would be extremely happy if you would tell others by pressing the share button below.

_________________

<< Amjad Islam “Amjad” >>

*******

Ham the hamaare saath koi teesra n thaa
Aisaa haseen din kahin dekhaa sunaa n thaa

*
AankhoN mein us ki tair rahe the hayaa ke rang
PalkeN uthaa ke meri taraf dekhtaa n thaa

*
Kuchh aise us ki jheel si aankheN thi har taraf
Ham ko siwaaye doobne ke raasta n thaa

*
HaathoN mein der tak koi khushbuu basi rahi
Darwaaza-e-chaman tha wo, baNd-e-qabaa n thaa

*
Us ke to aNg-aNg mein jalne lage diye
Jaadu hai mere haath mein, mujh ko pataa n thaa

*
Us ke badan ki lau se thi kamre mein raushni
KhiRki mein chaand, taaq mein ko’i diyaa n thaa

*
Kal raat woh nigaar, hua aisaa multafit*
AksoN ke darmiyaan ko’i aaina n thaa

*

SaaNsoN mein the gulaab to hoNtoN pe chaandni
In manzaroN se main to kabhi aashnaa n thaa

*
Royaa kuch is tarah mere shaane se lag ke woh
Aisaa laga ke jaise kabhi be wafaa n thaa

*
Hai ishq ek rog, mohabbat azaab hai
Ik roz ye kharaab kareN ge, kahaa n thaa!

*
“Amjad” wahaaN pe had koi rehti bhi kis tarah
Rukne ko keh raha thaa magar roktaa n thaa

***

(( Click Here for More  Kalaam e Amjad Islam Amjad ))