Jon Elia – Umar Guzaregi Imtehaan Mein Kya?

Jon Elia

Best Urdu Poetry By Jon Elia

♥

Umar guzregi imtehaan mein kya?
Daagh hi denge mujh ko daan mein kya?
♥
Meri har baat be-asar hi rahi
Nuqs hai kuchh mere bayaan mein kya?
♥
Mujh ko to koi tokta bhi nahin
Ye hi hotaa hai khaandaan mein kya?
♥
Apni mahrumiyaN chhupate hain
Ham gharibon ki aan-baan mein kya?
♥
Shaam hi se dukan-e-deed hai band
Nahin nuqsan tak dukaan mien kya?
♥
Wo mile to ye poochna hai mujhe
Ab bhi hun mein teri amaan mien kya?
♥
Bolte kyun nahin mere haq mein
Aable pad gaye zubaan mein kya?
♥
Khud ko duniyaN se mukhtalif jaana
Aagya tha mere gumaan mein kya?
♥
Hai naseem-e-bahaar gard aaluud
Khaak udti hai is makaan mein kya?
♥
Yun jo takta hai aasmaan ko tu
Koi rehta hai aasmaan mein kya?
♥
Ye mujhe chain kyun nahin padta
Ek hi shakhs tha jahaan mein kya?

♥♥♥

___By  Jon Elia

Mazeed :   Bikhre Moti

♥

Kalam-e-Sayyid   |   Kalam-e-Saahil   |   Kalam-e-Aamir