Bikhre Moti
<<->>
Kabhi saaya hai kabhi dhoop muqaddar meraa
Hotaa rehta hai yun hi qarz braabar meraa
*
Tuut jaate hain kabhi mere kinaare mujh mein
Doob jaata hai kabhi mujh mein samandar meraa
*
Kisi sehraa mein bichad jaayenge sab yaar mere
Kisi jangal mein bhatak jaayegaa lashkar meraa
*
Ba-wafaa tha to mujhe poochne waale bhi n the
Be-wafaa huN to huaa naam bhi ghar ghar meraa
*
Kitne hanste huae mausam abhi aate lekin
Ek hi dhoop se khumhlaa gayaa manzar meraa
*
By : Athar Nafees
*
Leave a Reply