786

Mein Dil Pe Jabr Karunga | Urdu Ghazal By Mohsin Naqvi

Ye ghazal janab mohsin naqvi ki mashhoor aur behtareen ghazaliyat mein se ek hai, ummid hai aap hazraat pasand farmayenge.

*

Mein dil pe jabr karunga tujhe bhula dunga
Marunga khud bhi, tujhe bhi kadi sazaa dunga

*

Ye teergi* mere ghar ka hi kyun muqaddar ho?
Mein tere shehr ke saare diye bujha dunga

Teergi = andhera

*

Hawa ka haath bataunga mein tabahi mein
Hare shajar* se parinde mein khud uda dunga

shajar = darakht, ped

*

Wafa karunga kisi sogwaar chehre se
Purani qabr pe qutba naya saja dunga

*

Isi khayaal mein guzri hai shaam-e-dard aksar
Ke dard had se badhega to muskira dunga

*

Tu aasman ki surat hai gir-padega kabhi
Zameen hun mein magar tujh ko aasra dunga

*

Badhaa rahi hai mere dukh, nishaniyaN teri
Mein tere khat, teri tasveer tak jalaa dunga

*

Bahot dinon se mera dil udaas hai “Mohsin”
Is aaine ko koi aks ab nayaa dunga

*

( Click here for more kalam-e-Mohsin Naqvi )