Mutafarriqaat – 1 (Miscellaneous poetry)

Bikhre Moti

* * * * *

KuubiyaN laakh kisi meN ho to charchaa n kare
Log karte hein buri baat ka charchaa kaisaa

(( Daag ))

***

Khwahish-e-wast to kyun kar kahun lekin naaseh
Dekh lene ka to hazarat ko bhi armaN hoga

(( Ameer Minaai ))

***

Dil zamane ke haath se saalim
Koi hogaa jo rehgaya hogaa

(( Meer Dard ))

***

Dil wahi dil hai jo ho apni hararat se fana
Khaak ho jaaye magar aag-bgula n bane

(( Yagana Changezi ))

***

UnheN zauq-e-ibadat bhi hai or gaane ki aadat bhi
Nikalti hai duaaeN un ke munh se thumriyaN ho kar

(( Akbar Allahabadi ))

***

Aqal phirti hai liye khaana-b-khana* ham ko
Ishq ab tuu hi bata koi thikaana ham ko

*Khana b Khana = Dar b dar

((Kalim Aajiz))

***

Tum ise shikwa samajh kar kis liye sharma gaye
MuddatoN ke baad dekha tha, ke aansoo aagaye

((Anwar Sabri))

***

Dono jahan ke aish ka malik wahi huwa
Baar-e-alam* uthaya hai jis ne khushi ke sath

*Baar-e-alam = gam ka boj

((Aazaad))

***

Zuban dil ki haqiqat ko kya bayaN karti
Kisi ka haal kisi se kaha nahin jaata

((Aziz lakhnavi))

***

Kuchh aise dil ne maze khoon-e-aarzoo ke liye
ZubaaN hai or tarastaa hun guftaguu ke liye

((Taskeen Quraishi))

***

Kalam-e-Sayyid   |   Kalam-e-Saahil   |   Kalam-e-Aamir