Saahil Qadri – HameN mehfooz rakhnaa hai | Ghazal

Saahil Qadri

Ghazal : A. Hafiz “Saahil Qadri” UK

♥

HameN mehfooz rakhnaa hai watan kee yaadgaaroN ko
kaheeN mandir kaleesaa to kaheeN gumbad minaaroN ko

bulaa leNge wo aakhir dar pe apne jaaN nisaaroN ko
falak aaghosh me letaa hai jese chaand taaroN ko

mre maazi se ghaafil ayk pal rehne naheeN dete
du’aayeN de rahaa hooN dil se apne ghamgusaaroN ko

ye kyaa insaaf hai kaante hi aaye uske daaman meN
ke jisne seencha apne khooN se gulshan kee bahaaroN ko

jo ismeN maslihat hai usko SAAHIL meN samajhtaa hooN
ke dil meN kyuN jaga detaa hooN meN gham ke sharaaroN ko

♥

Mazeed:  Kalaam e Saahil  |  FB Page