Urdu Shayari By Rehana Qamar

*

Us ka chehra bhi sunaata hai kahaani us ki
Chaahti hoon ke sunoon us se zubaani us ki

*

Wo sitamgar hai to ab us se shikayat kaisi
Ye sitam karna bhi aadat hai puraani us ki

*

Besh-qeemat hai yeh moti se meri palkon par
Chand aansu hain mere pass nishaani us ki

*

Us jafa-kaar* ko maloom nahin woh kya hai
Be-murawat ko hai tasveer dikhaani us ki

Jafakaar = Bewafa

*

Ek woh hai nazar andaaz kare hai mujh ko
Ek mein hoon ke dil-o-jaaN se deewani us ki

*

Tum ko ulfat hai “Qamar” us se to ab keh dena
Saamne sab ke suna-dena kahaani us ki

*

Return to Bikhre Moti