Rahat Indori Urdu Shayari / Ghazal

*

Safar ki had hai wahan tak ke kuchh nishaan rahe
Chale-Chalo ke jahan tak ye aasmaan rahe

*

Ye kya..!! uthaye qadam aur aa gai manzil
Maza to jab hai ke pairon mein kuchh thakaan rahe

*

Wo shakhs mujhko koi jaalsaaz lagta hai
Tum us ko dost samajhte ho par dhiyaan rahe

*

Mujhe zameen ki gehraaiyoN ne dhaanp liya
Mein chahta tha mere sar pe aasmaan rahe

*

Ab apne beech marasim nahin adavat hai
Magar ye baat hamare hi darmiyaan rahe

*

Magar sitaaron ki fasleN uga saka n koi
Meri zameen pe kitne hi aasmaan rahe

*

Wo ek sawaal hai phir us ka samna ho ga
Duaa karo ke salamat meri zubaan rahe

*

Mazeed: Rahat Indori