Woh Shakhs Ek Shaam Mien Kitna Badal Gaya

We would be extremely happy if you would tell others by pressing the share button below.

_________________

<< Amjad Islam “Amjad” >>

*******

Aankhon ka rang, baat ka lehja badal gayaa
Woh shaKhs ek shaam meiN kitnaa badal gayaa

*

Kuch din to mera a’ks raha aai’ne pe naqsh
Phir yun huaa, ke khud miraa chehraa badal gayaa

*

Jab apne apne haal pe hum tum n’ reh sake
To kyaa huaa jo ham se zamana badal gayaa

*

QadmoN talay jo ret bichhi thi wo chal padi
Us ne chhuraya haath to sehra badal gayaa

*

Koyi bhi chiiz apni jagah par nahin rahi
jaate hi ek shaKhs ke, kyaa, kyaa, badal gayaa

*

Uth kar chalaa gayaa koi waqfe ke darmiyaaN
Pardaa uThaa to saara tamashaa badal gayaa

*

Hairat se saare lafz use dekhte rahe
BaatoN mein apni baat ko kaisaa badal gayaa

*

Kehne ko ek sehn mein deevaar hi bani
Ghar ki fazaa makaan ka naqsha badal gayaa

*

Shaayad wafa kay khel se uktaa gayaa tha woh
Manzil kay paas aake jo rasta badal gayaa

*

Qaayem kisii bhi haal pay duniya nahiN rahi
Ta’beer kho gayi, kabhi sapnaa badal gayaa

*

Manzar ka rang a’sl mein saaya tha rang kaa
Jis ne use jidhar say bhi dekhaa, badal gayaa

*

AankhoN meiN jitne ashk the jugnuu se ban gaye
Woh muskuraaya aur miri dunyaa badal gayaa

*

Apni gali meN apna hi ghar dhuuNDhte hain log
“Amjad” yeh kaun shehr ka naqsha badal gayaa

***

(( Click Here for More  Kalaam e Amjad Islam Amjad ))