Ye Zindagi To Koi Bad-Duaa Lage Hai Mujhe

-: Jan Nisar Akhtar :-

***

Har ek rooh men ek gham chhupaa lage hai mujhe
Ye zindagi to koi bad-duaa lage hai mujhe

*

Jo aansuon men kabhi raat bhig jaati hai
Bohut qareeb wo aawaaz-e-paa* lage hai mujhe

Aawaaz e paa = qadmon ki aawaaz

*

Main so bhi jaauun to kyaa meri band aankhon me
Tamaam raat koii jhaanktaa lage hai mujhe

*

Main jab bhi uske khayaalon men kho-saa jaataa hun
Wo Khud bhi baat kare to buraa lage hai mujhe

*

Dabaa ke aai hai seene men kaun si aaheN
Kuchh aaj rang teraa saanwlaa lage hai mujhe

*

N jaane waqt ki raftaar kyaa dikhaati hai
Kabhi kabhi to bdaa Khauf saa lage hai mujhe

*

Bikhar gayaa hai kuchh is tarha aadmi kaa wujood
Har ek fard koi saanehaa* lage hai mujhe

Saanehaa = Haadsa

*

Ab, ek-aadh qadam ka hisaab kyaa rakhiye
Abhi talak to wahii faaslaa lage hai mujhe

*

Hikaayat-e-gham-e-dil* kuchh kashish to rakhti hai
Zamaana Ghaur se suntaa huaa lage hai mujhe

Hikaayat-e-gham-e-dil = Dil ke gham ki kahani

***

(( Click here for more Kalam-e-JaaN Nisar Akhtar ))