web statistics

Mehfil-e-Shayri

The Grand Collection of Great Urdu Poetry / Shayari

daagh dehelvi

ApnoN Se Huwa Ye Kuchh, BegaanoN Se Kya Hota

by 2 Comments

#Daagh #Urdu #Shayari

♥

Taubah hai haseenoN ko gar paas-e-wafaa hota
Kya jaaniye kya karte, kya jaaniye kya hota

♥
Saaqi teri mehfil mein charchaa hi nahin may ka
Is se to ye behtar tha, kuchh zikar-e-khuda hota

♥
Dil ne mujhe tadpaya, aankhoN ne kiya ruswaa
ApnoN se huwa ye kuch, begaanoN se to kya hota

♥
GairoN ki shikayat par, furqat* ki hikaayat* par
Gar tum n khafaa hote, to kon khafaa hota

Furqat = Judaai | Hikayat = Kahani

♥

Mehfil mein sunaya tha, afsaan-e-gham mein ne
ilzaam ye rakkhaa hai, khalwat* mein kaha hota

khalwat = tanhaai

♥

Faryaad-o-fugaaN* se tum ay “daagh” bure thehre
Kuchh bhi n kiya hota, kuchh bhi n huwa hota

FugaaN = Rona/Chillana

♥

Mazeed: kalam-e-Daagh Dehelvi

Facebooktwitterredditpinterestlinkedinmail
Post Views: 1,978

Naya Salaam Kis Ka Tha | Full Ghazal By Daagh Dehelvi

by 1 Comment

#Daagh Dehlvi Full Ghazal | #Urdu Shayari

♥

Tumhare khat mein naya ek salaam kis ka tha?
N tha raqeeb to aakhir woh naam kis ka tha?

♥
Wo qatal kar ke mujhe, har kisi se poochte hain
Ye kaam kis ne kiya hai? ye kaam kis ka tha?

♥
Wafaa karenge, nibaahenge, baat manenge
Tumhe bhi yaad hai kuch, ye kalaam kis ka tha?

♥
Hamare khat ke to purze kiye, padhaa bhi nahin
Suna jo tum ne b-dil wo pyaam kis ka tha?

♥
Raha n dil mein wo bedard, or dard rahaa
Muqeem kon huwa hai, maqaam kis ka tha?

♥
N poochh-gaachh wahan thi, n koi aaw-bhagat
Tumhari bazm mein kal ehtimaam kis ka tha?

♥
Tamam bazm jise sun ke rehgaai mushtaaq
Kaho, wo tazkir-e-na-tamaam kis ka tha?

♥
Guzar gaya woh zamana kahun to kisse kahun
Khayaal dil ko mere subah-o-shaam kis ka tha?

♥
Har ek se kehte hain kya “daagh” bewafaa nikla
Ye poochhe unse koi woh gulaam kis ka tha?

♥

Mazeed: kalam-e-Daagh Dehelvi

♥

Watch on YouTube

Facebooktwitterredditpinterestlinkedinmail
Post Views: 14,848

Jahan Tere Jalwe Se Ma’amoor Nikla | Daagh

by Leave a Comment

Daagh Dehelvi Urdu Shayari

♥

Jahan tere jalwe se ma’amoor nikla
Padi aankh jis koh par toor nikla

♥
Wujood-o-adam donoN ghar paas nikle
N ye door nikla n woh door nikla

♥
Kahan reh ke taubah nibaahuN ilahi
Ke jannat mein bhi majma-e-hoor nikla

♥
Shab-e-wasl zikar-e-adoo par wo bole
Khuda ke liye kyun ye mazkoor nikla

♥
Samajh te the ham “daagh” gumnaam hoga
Magar woh to aalam mein mash’hoor nikla

♥

(( Click here for more kalam-e-Daagh Dehelvi ))

Facebooktwitterredditpinterestlinkedinmail
Post Views: 13,953

Jhoothe Ka Aitebaar Kiya, Ham Ne Kya Kiya.!

by Leave a Comment

<< Daagh Dehelvi >>

<< = >>

Wa’ade pe intezaar kiya, ham ne kya kiya
Jhoothe ka aitebaar kiya, ham ne kya kiya

*
HaaN haaN, tadap tadap ke guzari tum hi ne raat
Tum ne hi intezaar kiya, ham ne kya kiya?

*
Itra raha hai naqd-e-muhabbat* pe dil bohot
Auchhe ko maldaar kiya, ham ne kya kiya

*naqd e muhabbat = Muhabbat ki Dolat

*
Kya farz tha ke sabar hi karte firaaq mein
Kyun jabar ikhtiyaar kiya, ham ne kya kiya

*
Khete hain woh shikayat-e-bedaad-o-jor* par
Tujh ko khuda ne khwaar kiya, ham ne kya kiya

*bedaad-o-jor = zulm o sitam

*
Naseh* bhi hai raqeeb, ye ma’aloom hi n tha
Kis ko slahkaar kiya, ham ne kya kiya

*Naseh = Nasehat karne wala

*
Pehle to munfail* wo huwe phir bigad gaye
Kyun shikwah baar-baar kiya, ham ne kya kiya

*Mun-fail = Sharmindah

*
Keh-denge ham to dawar-e-mehshar* se saaf saaf
AchchhoN ko dil ne pyaar kiya, ham ne kya kiya

*dawar-e-mehshar = Hashr/Qayamat ke din ka malik / Allah

*
Ruswa kiya jo dil ne to ab keh rahe hen “daagh”
Dushman ko raaz-daar kiya, ham ne kya kiya

*

(( Click here for more kalam-e-Daagh Dehelvi ))

Facebooktwitterredditpinterestlinkedinmail
Post Views: 3,999

Tujh Ko Muztar Nahin Dekha Jaataa | Daagh Dehelvi

by Leave a Comment

<< Daagh Dehelvi >>

<< = >>

Rashk-e-dushman bhi gawaara lekin
Tujh ko muztar nahin dekha jaataa

*
Ay pareshan nazr! kyun hai talaash
Dil ke nadar nahin dekha jaataa?

*
Dil mien kya khaak use dekh sakeN
Jis ko bahar nahin dekha jaataa

*
Taubah kebaad bhi khaali khaali
Koi saghar nahin dekha jaataa

*
Ham jahan hain wahin dekhenge tujhe
Ham se ghar ghar nahin dekha jaataa

*
Khat mera phenk diya ye keh kar
Ham se daftar nahiN dekha jaataa

*
Mukhtasar ye hai ke ab “daagh” ka haal
Bandah parwar..!! nahin dekha jaataa

*

(( Click here for more kalam-e-Daagh Dehelvi ))

Facebooktwitterredditpinterestlinkedinmail
Post Views: 3,549